3 min 846 məhkum barəsində amnistiya aktı tətbiq olunub

“Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarı 2025-ci il dekabrın 22-dən 2026-cı il yanvarın 7-dək Ədliyyə Nazirliyinin Penitensiar və Probasiya xidmətləri üzrə (Naxçıvan MR da daxil olmaqla) 3 min 846 məhkum barəsində tətbiq olunub.

Ədliyyə Nazirliyinin mətbuat xidmətindən Globalart.az-a verilən məlumata görə, onlardan 1799-u müəyyən müddətə azadlıqdan məhrumetmə, 1764-ü azadlıqdan məhrumetmə ilə əlaqədar olmayan cəzalardan azad edilib. 250 nəfərin azadlıqdan məhrumetmə, 33 nəfərin isə azadlıqdan məhrumetmə ilə əlaqədar olmayan cəzaları 6 ay azaldılıb.

Cəzaçəkmə müəssisələrində cəza çəkənlərdən Vətən müharibəsində iştirak etdiyinə görə 2 nəfər, qərar qüvvəyə mindiyi günədək 60 yaşına çatdığına görə isə 8 nəfər cəzadan azad olunub.

Amnistiya tətbiq olunanlardan 367-si böyük ictimai təhlükə törətməyən, 2 min 992-si az ağır, 487-si ağır cinayətlər törətmiş şəxslərdir.

Həmçinin amnistiya tətbiq olunmuş şəxslərdən 3 min 625-i kişi, 210-u qadın, 11-i yetkinlik yaşına çatmayan şəxslərdir.

Amnistiya aktının icrası davam etdirilir.