Azərbaycan şirkətləri Moskvada “Prodexpo-2026” sərgisində təmsil olunur

“Prodexpo-2026” beynəlxalq ərzaq məhsulları sərgisi çərçivəsində Azərbaycan və Rusiya istehsalçıları arasında əməkdaşlığın genişləndirilməsi perspektivləri müzakirə edilib.

Globalart.az “AZƏRTAC”a istinadən xəbər verir ki, səfirliyin nümayəndələri iqtisadi-ticari əməkdaşlığın genişləndirilməsinə yönəlmiş bir sıra görüşlər keçiriblər. “Qrand-Treyd” ASC-nin GR-direktoru Dmitri Proxorenko ilə də görüş reallaşıb. Onun rəhbərlik etdiyi şirkət müxtəlif ölkələrdən Rusiyaya ərzaq və qeyri-ərzaq məhsullarının aparıcı təchizatçılarından biridir. Tərəflər “Qrand-Treyd” ASC ilə ərzaq və içkilərin istehsalı və satışı üzrə ixtisaslaşmış Azərbaycan şirkətləri arasında uğurlu qarşılıqlı fəaliyyətdən məmnunluqlarını ifadə ediblər.

“Biz Azərbaycanla fəal işləyirik, orada çoxlu əlaqələrimiz var”, – deyə şirkətin nümayəndələri bildiriblər.

Söhbət zamanı vurğulanıb ki, ötən ilin yekunlarına görə, Rusiya Azərbaycanın qeyri-neft məhsullarının ən böyük alıcısı mövqeyini qoruyub saxlayıb. Belə ki, tədarük həcmi 1,174 milyard ABŞ dolları təşkil edib. Bu kontekstdə D.Proxorenko qeyd edib ki, ötən il “Qrand-Treyd” ASC Rusiya bazarında sonrakı distribusiya üçün Azərbaycandan 92 milyon ABŞ dolları məbləğində kənd təsərrüfatı məhsulları idxal edib.

Həmsöhbətlər, həmçinin ikitərəfli ticarət əlaqələrinin və Azərbaycan ərzaq məhsullarının geniş çeşidinin tədarükünün təkcə Rusiyaya deyil, həm də “Qrand-Treyd” ASC-nin ticarət fəaliyyəti apardığı Çin, Vyetnam və BƏƏ daxil olmaqla digər iri ölkələrə artırılması potensialını nəzərdən keçiriblər. Tərəflər Azərbaycanla Rusiya arasında iqtisadi-ticari sahədə qarşılıqlı fəaliyyətin daha da genişləndirilməsi imkanlarının öyrənilməsi məqsədilə şirkət nümayəndələrinin Azərbaycana səfərinin təşkil edilməsi barədə razılığa gəliblər.

Daha sonra səfirliyin nümayəndələri “Prodexpo-2026” sərgisində təmsil olunan Azərbaycan şirkətlərinin stendləri ilə tanış olublar. Onların sırasında “Azersun Holding”, “Shirvan Wines”, “Absheron Olive Garden”, “Olivea”, “Avrora”, “ENNA” və “Mors Trading” yer alıb.

“Prodexpo” Rusiyada hər il yeni ticarət nişanlarının, brendlərin və innovativ məhsulların təqdim olunduğu ən böyük ərzaq sərgisidir. Bu il sərgidə dünyanın 37 ölkəsindən təxminən 2 min iştirakçı öz məhsullarını nümayiş etdirir.

Sərgi fevralın 12-dək davam edəcək.

Globalart.az