Azərbaycan və Ukrayna biznes dairələrinin iştirakı ilə dəyirmi masa təşkil olunub

Tədbirdə qarşılıqlı maraq doğuran əməkdaşlıq imkanları və tərəfdaşlıq formatlarına dair müzakirələr aparılıb. 

Globalart.az “KOBIA”ya istinadən xəbər verir ki, “Bakı KOB evi”ndə Kiçik və Orta Biznesin İnkişafı Agentliyinin (KOBİA) təşkilatçılığı, Azərbaycan və Ukrayna sahibkarlarının iştirakı ilə dəyirmi masa təşkil olunub. Hibrid formatda təşkil olunmuş tədbir Azərbaycan–Ukrayna İşgüzar Şurası çərçivəsində keçirilib. Dəyirmi masada tikinti, sənaye, kənd təsərrüfatı, logistika, ticarət, tekstil, konsaltinq, zərgərlik və s. sektorlarda fəaliyyət göstərən 30-a yaxın iş adamı iştirak edib. 

Ukraynanın Azərbaycandakı fövqəladə və səlahiyyətli səfiri Yuri Qusev, səfirin müavini Emir Rüstəmov və KOBİA-nın nümayəndələri belə tədbirlərin biznes əlaqələrinin genişlənməsinə xidmət etdiyini vurğulayıblar. 

Azərbaycan–Ukrayna İşgüzar Şurasının həmsədri Şahin Yusifov Şuranın fəaliyyəti barədə məlumat verib, həmçinin sahibkarlar arasında əlaqələrin genişləndirilməsi, birbaşa müzakirələrin aparılması və əməkdaşlıq imkanlarının dəyərləndirilməsi üçün yaradılmış onlayn platformanı təqdim edib.  

Tədbir çərçivəsində iş adamları fəaliyyət sahələri barədə təqdimatlar edib, qarşılıqlı maraq doğuran əməkdaşlıq imkanları və tərəfdaşlıq formatlarına dair müzakirələr aparılıb, “B2B” görüşlər keçirilib.  

Globalart.az