Bahar Muradova: Azərbaycanda tarixən yaşayan insanlar bizi birləşdirən dəyərləri daim üstün tutublar

Azərbaycanda tarixən yaşayan, sonradan buraya köç edən, özünə Vətən seçən insanlar dini inancından, siyasi mövqeyindən və hansı mədəni keyfiyyətlərə, ailə dəyərlərinə malik olmasından asılı olmayaraq, bizi birləşdirən dəyərləri üstün tutublar.

Globalart.az “AZƏRTAC”a istinadən xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova noyabrın 5-də Bakıda keçirilən “Fərqliliyin rəngi” adlı festivalın açılış mərasimində çıxışı zamanı deyib.

O bildirib ki, müstəqillik tam mənada xalqın iradəsinə söykənməsə, dövlətin bütövlüyünü qorumaq mümkün deyil. “Biz tariximizdə belə acılı günləri yaşamışıq, amma Zəfər zirvəsindən keçmişə baxanda, bu günü dəyərləndirəndə və gələcəyə yönəlik planlarımızı formalaşdıranda istinad nöqtəmiz, ilk növbədə, bax, bu fərqliliyin yaratdığı vəhdətdir. Bu fərqliliyin yaratdığı həmrəylik və birlikdir. Biz, ilk növbədə, buna söykənərək Azərbaycan adlı məmləkəti dünyaya bəyan etmişik”, – deyə B.Muradova qeyd edib.

Globalart.az