Bakıda II Azərbaycan–Özbəkistan Media Forumu keçirilir

Bakıda “Rəqəmsal transformasiya və media” mövzusuna həsr olunmuş II Azərbaycan–Özbəkistan Media Forumu başlayıb. Forum Media İnkişaf Agentliyinin (MEDIA) təşkilatçılığı ilə keçirilir.

Tədbir Azərbaycan və Özbəkistan arasında media sahəsində əməkdaşlığı əks etdirən videoçarxla açılıb. Media İnkişaf Agentliyinin icraçı direktoru Əhməd İsmayılov çıxışında bildirib ki, iki ölkə arasındakı tarixi dostluq və strateji tərəfdaşlıq, Prezident İlham Əliyev və Prezident Şavkat Mirziyoyevin uzaqgörən liderliyi sayəsində yeni mərhələyə qədəm qoyub.

Ə.İsmayılov media sahəsində qarşılıqlı təcrübə və bilik mübadiləsinin, rəqəmsal mediaya keçid, yeni texnologiyaların tətbiqi və peşəkar jurnalistikanın standartlarının qorunması baxımından önəmli olduğunu vurğulayıb.

O qeyd edib ki, bu gün xəbər yalnız qəzet və televiziyadan deyil, həm də sosial şəbəkələr, mobil cihazlar və süni intellekt əsaslı platformalar vasitəsilə formalaşır. “İnformasiyanın tez çatdırılması artıq kifayət etmir – əsas məsələ etibarlılıq, faktların yoxlanması və ictimai inamdır”, – deyə o bildirib.

Forum çərçivəsində rəqəmsal dövrdə medianın gələcəyi, süni intellektin rolu və jurnalistikanın yeni çağırışları ətrafında fikir mübadiləsi aparılır.

Globalart.az