Cem Adrian Bakıda “Sarı gəlin” oxudu

Türkiyənin sevilən sənətçisi Cem Adrian 24 dekabr tarixində Bakıda, Heydər Əliyev Sarayında Event Office-in təşkilatçılığı ilə möhtəşəm konsert proqramı ilə çıxış edib. Zalın tam dolu olduğu gecədə Cem Adrian sevənləri sənətçinin ifasını böyük coşqu və maraqla qarşılayıblar.

Konsert zamanı səhnədən tamaşaçılara müraciət edən Cem Adrian Azərbaycanı çox sevdiyini bildirib və bu sevgini hər ifasında hiss etdirdiyini vurğulayıb. Özünəməxsus, geniş diapazonlu vokalı və dərin lirizmlə seçilən repertuarı ilə sənətçi dinləyicilərinə unudulmaz, duyğularla zəngin anlar yaşadıb. Lirik mahnılar zalda kövrək anlara səbəb olub, tamaşaçıların bir çoxu ifalara səmimi şəkildə qoşularaq mahnıları əzbərdən oxuyub.

Gecənin xüsusi diqqət çəkən məqamlarından biri Cem Adrianın qırmızı işıqlar altında səhnədə tək bir kürsüdə əyləşərək ifa etməsi olub. Sadə, lakin təsirli səhnə tərzi musiqinin emosional gücünü daha da ön plana çıxarıb. Sənətçi 1 saat yarım davam edən konsert boyunca tam canlı ifa edib və bu da tamaşaçıların alqışları ilə müşayiət olunub.

Konsertin ən yaddaqalan anlarından biri isə zalda baş tutan evlilik təklifi olub. Sürpriz romantik an tamaşaçılar tərəfindən böyük alqışlarla qarşılanıb və gecəyə xüsusi ovqat qatıb. Bundan əlavə, Cem Adrianın Azərbaycan xalq mahnısı “Sarı gəlin”i ifa etməsi zalda xüsusi coşğu yaradıb və uzun müddət alqışlanıb.

Heydər Əliyev Sarayı bu dəfə də möhtəşəm konsertə yüksək səviyyədə ev sahibliyi edib. Cem Adrianın Bakıda baş tutan bu konserti həm musiqisi, həm də yaşanan emosional anlarla uzun müddət yaddaşlardan silinməyəcək.