D-8 ölkələrinin Gənclər Dialoqunun açılış mərasimi keçirilib

Azərbaycan ilk dəfə olaraq D-8 ölkələrinin Gənclər Dialoquna ev sahibliyi edir.

Globalart.az xəbər verir ki, Dialoqun rəsmi açılış mərasimi keçirilib.

Tədbir Azərbaycanın Dövlət Himninin səsləndirilməsi və qısa videoçarxın nümayişi ilə başlayıb.

Gənclər və idman naziri Fərid Qayıbov ölkəmizdə həyata keçirilən gənclər siyasətindən bəhs edib və ölkə rəhbərliyinin gənclərə göstərdiyi daimi dəstəyindən danışıb. Nazir dialoqun üzv dövlətlərin gəncləri arasında əlaqələri inkişaf etdirəcəyini və birgə təşəbbüslərin reallaşmasına töhfə verəcəyini qeyd edib.

2025-ci il Gənclər Paytaxtı Sumqayıtda keçirilən tədbirlərin gənclər üçün faydalı olacağını qeyd edən nazir iştirakçıları dialoqlarda aktiv iştirak etməyə dəvət edib.

D-8 İqtisadi Əməkdaşlıq Təşkilatının baş katibi İsiaka Abdulqadir İmam dialoqun D-8 ölkələrinin gəncləri arasında korporativ əlaqələrin gücləndirilməsində əhəmiyyətli olacağını deyib. Baş katib çıxışında layiqli ev sahibliyi üçün Azərbaycana təşəkkür edib.

Dövlət Şəhərsalma və Arxitektura Komitəsinin sədri Anar Quliyev şəhərsalma və davamlı inkişaf istiqamətləri ilə bağlı çıxış edib. Gənclərin sosial inkişafın, innovasiyanın, dayanıqlılığın aparıcı qüvvəsi olduğunu vurğulayan sədr gələcək nəsillər üçün birgə əməkdaşlığın vacib olduğunu qeyd edib. Anar Quliyev 2026-cı ildə ölkəmizin ev sahibliyi edəcəyi 13-cü Ümumdünya Şəhərsalma Forumunda gənclərin innovativ təşəbbüslərinin xüsusi əhəmiyyət daşıdığını qeyd edib.

Xarici işlər nazirinin müavini, COP29-un baş danışıqçısı Yalçın Rəfiyev qlobal iqlim gündəliyində gənclərin roluna toxunub. Nazir müavini D-8 Gənclər Dialoqunun da gənclər arasında fikir mübadiləsi üçün mühüm platforma olacağını qeyd edib.

Somalinin gənclər və idman naziri Mohamed Abdulkadir tədbirdə xüsusi qonaq qismində iştirak edərək, dialoqda ölkələrarası birlik və təcrübə mübadiləsinin önəmini vurğulayıb.

BMT-nin Dayanıqlı İnkişaf Məqsədləri üzrə Gənc Lideri, İordaniya Kosmik Tədqiqatlar Təşəbbüsü (JSRI) Kommunikasiya və Maarifləndirmə direktoru Merna Alzurikat Dayanıqlı İnkişaf Məqsədləri çərçivəsində beynəlxalq əməkdaşlığın vacibliyini qeyd edib.

Açılış sessiyası iştirakçı ölkələrdən gələn nümayəndələrlə birgə fikir mübadiləsi ilə davam edib.

Dialoq çərçivəsində növbəti günlərdə gənclər siyasəti, innovasiya, iqlim və urbanizasiya mövzularında panel müzakirələri keçiriləcək.

Globalart.az