Diesel: Moda Dünyasının Cəsarətli Brendi necə yarandı?

Diesel markası 1978-ci ildə italiyalı moda dizayneri Renzo Rosso tərəfindən təsis edilib. Rosso gənc, enerjili və fərqli bir brend yaratmağı qarşısına məqsəd qoymuşdu və qısa müddətdə bu məqsədinə nail oldu. Diesel ilk gündən etibarən yenilikçi, cəsarətli və qaydalara meydan oxuyan dizaynları ilə moda dünyasında diqqət mərkəzinə çevrildi.

Globalart.az bildirir ki, Diesel özünü yalnız bir geyim markası kimi deyil, eyni zamanda bir həyat tərzi brendi kimi təqdim etdi. Markanın fəlsəfəsini əks etdirən “Only The Brave” (“Yalnız cəsurlar”) şüarı Diesel-in azad ruhunu, özgüvənini və fərqliliyini açıq şəkildə ifadə edir.

Diesel xüsusilə denim (cins) məhsulları ilə tanındı. Klassik jean modellərini müasir və yaradıcı toxunuşlarla birləşdirən marka, qısa zamanda fərqlənməyi bacardı. Diesel cinsləri yüksək keyfiyyəti, davamlılığı və özünəməxsus üslubu ilə məşhurlaşdı.

Zaman keçdikcə marka fəaliyyət dairəsini genişləndirərək t-shirt, gödəkçə, aksesuar və ayaqqabı kimi müxtəlif məhsulları da kolleksiyalarına əlavə etdi. Diesel-in moda dünyasındakı təsiri təkcə məhsullarla məhdudlaşmadı. Xüsusilə 1990-cı illər və 2000-ci illərin əvvəllərində təqdim olunan reklam kampaniyaları cəsarətli, provokativ və bəzən mübahisəli məzmunu ilə böyük səs-küy yaratdı. Bu kampaniyalar markanın gənc, azad və asi imicini daha da gücləndirdi.

Diesel moda sahəsində qazandığı uğuru parfüm dünyasına da daşıdı. Marka ilk ətirini 1996-cı ildə bazara təqdim etdi və qısa müddətdə parfüm sənayesində də tanınmağa başladı. Diesel parfümləri də geyimlərdə olduğu kimi cəsarətli, iddialı və xarakterli notları ilə seçilir.

Diesel-in ən ikonik ətirlərindən biri olan Only The Brave, cəsarətli və özünə güvənən kişilər üçün yaradılıb. Odunsu və şərq notlarının harmoniyası ilə seçilən bu parfüm güclü və qalıcı təsir bağışlayır. Üst notlarda berqamot, limon və bənövşə yarpaqları təravətli başlanğıc yaradır. Orta notlarda sidr ağacı, keşniş və bənövşə dərinlik qatır. Alt notlarda isə amber və dəri kimi isti akkordlar parfümün qalıcılığını artırır.

Fuel For Life həyat enerjisini və dinamizmi əks etdirən bir ətirdir. Anis, qreyfrut və lavanda ilə açılan bu kompozisiya ürək notlarında moruq və heliotropla daha cazibədar və şirin bir çalar qazanır. Odunsu alt notlar isə ətirə istilik və dərinlik verir.

Adından da göründüyü kimi Diesel Bad, asi və cazibədar ruhu təmsil edir. Berqamot, lavanda və kakule ilə təravətli başlanğıc edən bu parfüm, orta notlarda kürü akkordu, iris kökü və adaçayı ilə fərqlilik yaradır. Tonka paxlası, işlənmiş dəri və odunsu notlar isə ətiri qalıcı və təsirli finala daşıyır.

Bu gün Diesel hələ də yenilikçi və dinamik mövqeyini qoruyaraq moda dünyasında mühüm yer tutur. Marka eyni zamanda dayanıqlılıq və ətraf mühitə dost istehsal prinsiplərinə önəm verərək gələcəyə məsuliyyətli yanaşma nümayiş etdirir. Diesel-in geyim və parfüm məhsulları dünya üzrə geniş bir istifadəçi auditoriyası tərəfindən böyük maraq və rəğbətlə qarşılanır.

Globalart.az