Dövlət Suverenliyi Günü münasibətilə Xankəndi şəhərinə mediatur təşkil olunub

Azərbaycan Respublikasının Mədəniyyət Nazirliyi tərəfindən 20 sentyabr – Dövlət Suverenliyi Günü və “Konstitutsiya və Suverenlik İli” çərçivəsində Xankəndi şəhərinə mediatur həyata keçirilib. Globalart.az  Azərbaycan Respublikası Mədəniyyət Nazirliyinə istinadən xəbər verir ki, səfər zamanı media nümayəndələri şəhərdəki Konqres Mərkəzi, Biznes Mərkəzi, inşası davam etdirilən Zəfər parkı və Zəfər Muzeyi, Qarabağ Universiteti və digər mühüm obyektlərlə tanış olublar.

Xankəndi şəhərində, Ağdərə və Xocalı rayonlarında Bərpa, Tikinti və İdarəetmə xidmətinin ictimaiyyətlə əlaqələr şöbəsinin əməkdaşı Şamxal Adıgözəlov media nümayəndələrinə müəssisələr haqqında geniş məlumat verib, onların suallarını cavablandırıb.

Jurnalistlər, həmçinin Mədəniyyət Nazirliyi və Prezidentin Xankəndi, Ağdərə və Xocalı rayonları üzrə xüsusi nümayəndəliyinin təşkilatçılığı ilə ilk dəfə keçirilən 20 sentyabr – Xankəndi Şəhər Günü tədbirlərində iştirak ediblər.

Mediatur həm şəhərin müasir siması ilə tanışlıq, həm də Şəhər Günü münasibətilə təşkil olunan mədəni proqramlar baxımından iştirakçılarda unudulmaz təəssüratlar yaradıb.

Xatırladaq ki, Prezident İlham Əliyevin 19 sentyabr 2024-cü il tarixli Sərəncamı ilə 20 sentyabr tarixi Dövlət Suverenliyi Günü kimi təsis olunub və rəsmi təqvimə daxil edilib.

Globalart.az