İqtisadiyyat nazirinin müavini Türkmənistan İnvestisiya Forumunda iştirak edib

Türkmənistan İnvestisiya Forumunda Azərbaycanın əlverişli biznes mühiti diqqətə çatdırılıb. Globalart.az Azərbaycan Respublikasının İqtisadiyyat Nazirliyinə istinadən xəbər verir ki, 18-19 sentyabr tarixlərində Türkmənistanın Avaza şəhərində keçirilən Forumda müxtəlif ölkələrin nümayəndələri, beynəlxalq qurumların təmsilçiləri və iş adamları iştirak ediblər. Tədbir çərçivəsində ölkələrin iqtisadi potensialı təqdim olunub, beynəlxalq əməkdaşlıq və investisiya imkanlarının genişləndirilməsi müzakirə edilib. Azərbaycanı forumda iqtisadiyyat nazirinin müavini Sahib Ələkbərov təmsil edib.

Plenar sessiyada çıxış edən Sahib Ələkbərov bildirib ki, Azərbaycan və Türkmənistan prezidentləri arasında formalaşmış yüksək səviyyəli etimad və dostluq münasibətləri iki ölkə arasında əməkdaşlığın inkişafına güclü təkan verir. Onun sözlərinə görə, birgə layihə və təşəbbüslərin icrası əməkdaşlığın möhkəmlənməsinə xidmət edir, Orta Dəhlizin səmərəliliyinin artırılmasında isə ölkələrimiz xüsusi rol oynayır. Nazir müavini əlavə edib ki, Azərbaycan-Türkmənistan tranzit daşımaları son illər yüksələn dinamika nümayiş etdirir. Təkcə 2025-ci ilin ilk yeddi ayında daşımaların həcmi 1,28 milyon tona çatıb ki, bu da ötən illə müqayisədə 13% çoxdur. Bu fakt nəqliyyat və logistika sahəsində tərəfdaşlığın getdikcə gücləndiyini göstərir.

Forumda həmçinin Azərbaycanın əlverişli iş mühiti, azad edilmiş ərazilərdə həyata keçirilən genişmiqyaslı bərpa və quruculuq işləri, xarici investorlar üçün yaradılmış imkanlar və tətbiq olunan güzəştlər barədə məlumat verilib. Bununla yanaşı, ölkənin strateji nəqliyyat-logistika imkanları, Zəngəzur dəhlizinin perspektivləri, Ələt Azad İqtisadi Zonası və sənaye zonalarının investisiya potensialı təqdim olunub. Sahib Ələkbərov enerji, ticarət, qarşılıqlı investisiyaların təşviqi, nəqliyyat və kənd təsərrüfatı da daxil olmaqla müxtəlif sahələrdə birgə əməkdaşlığın genişləndirilməsi perspektivlərini vurğulayıb.

Globalart.az