İsveçdə Zəfər Gününə həsr olunmuş tədbir keçirilib

İsveçin Höteborq şəhərində Azərbaycan Respublikasının Diasporla İş üzrə Dövlət Komitəsinin dəstəyi və Azərbaycan–Qarabağ Mərkəzinin təşkilatçılığı ilə Zəfərin 5-ci ildönümü münasibətilə bayram tədbiri keçirilib.

Globalart.az “AZƏRTAC”a istinadən xəbər verir ki, bayram tədbiri uşaqların ifasında təqdim olunan vətənpərvər səhnəciklə başlayıb. Daha sonra şəhidlərimizin əziz xatirəsi bir dəqiqəlik sükutla yad edilib və Azərbaycan Respublikasının Dövlət Himninin səsləndirilməsi ilə tədbir rəsmi şəkildə açıq elan olunub.

Uşaqlardan ibarət “Xarı Bülbül” rəqs qrupunun balaca üzvləri milli rəqslərimizi ifa edərək böyük alqışlarla qarşılanıblar. Ardınca “Şuşanın dağları”, “Azərbaycan”, “Qarabağ” mahnılarını ifa edilib.

Mərasim zamanı milli atributlardan ibarət kiçik bir sərgi də təqdim olunub.

Globalart.az