Məhsullarımız Aktauda

Aktau şəhərində “Manqistau vilayətinin ticarət potensialı” mövzusunda beynəlxalq forum keçirilib.

Globalart.az “AZƏRTAC”a istinadən xəbər verir ki, Azərbaycanın Aktaudakı baş konsulluğuna istinadən xəbər verir ki, tədbirdə Manqistau vilayətinin akim müavini Tilek Jetkizqenulı çıxışında vilayətin nəqliyyat-logistika imkanları, ticarət infrastrukturunun inkişafı və ixrac potensialının artırılması barədə məlumat verib.

Akim müavini tədbirdə, həmçinin Aktau şəhərində akkreditə olunan Türkiyə, Türkmənistan, Özbəkistan və İranın Baş Konsulluqlarının rəhbərlərinə, eləcə də Azərbaycanın Aktau şəhərindəki baş konsulu Ayxan Süleymanlıya vilayətin sosial-iqtisadi inkişafına verdikləri dəstəyə görə təşəkkür məktubları təqdim edib.

Forum çərçivəsində iki istiqamət üzrə panel sessiyaları keçirilib. Birinci panel sessiyası “İxrac potensialı”, ikinci panel sessiyası isə “Maliyyə dəstək alətləri” mövzularına həsr olunub. Sessiyalarda kiçik və orta sahibkarlığın dəstəklənməsi üçün yeni mexanizmlər və Qazaxıstan İxrac-Kredit Agentliyinin təqdim etdiyi dəstək alətləri müzakirə edilib.

Forum çərçivəsində, həmçinin yarmarka təşkil edilib. Baş Konsulluğun təşkilatçılığı ilə yarmarkada ölkəmizi “KazFruit” şirkəti və “Grandmart” marketi təmsil edib, ziyarətçilərə dadlı meyvələr və ölkəmizdə istehsal olunan ərzaq məhsulları təqdim olunub.

Globalart.az