Mətbəximiz Vyetnam festivalında

Vyetnam Xarici İşlər Nazirliyinin təşkilatçılığı ilə Hanoy şəhərində 13-cü “Beynəlxalq Kulinariya Mədəniyyəti Festivalı” adlı xeyriyyə yarmarkası keçirilib.

Globalart.az “AZƏRTAC”a istinadən xəbər verir ki, festivalın açılış mərasimində Vyetnam Kommunist Partiyası Mərkəzi Komitəsinin Baş katibi To Lamın həyat yoldaşı xanım No Fon Li, dövlət və hökumət rəsmiləri, Vyetnamda akkreditə olunmuş diplomatik missiya rəhbərləri, bölgələrin təmsilçiləri, habelə qeyri-hökumət təşkilatları və media nümayəndələri iştirak ediblər.

Festival zamanı Azərbaycan stendində ölkəmizə aid milli suvenirlər, Ulu Öndər Heydər Əliyevin 1983-cü ildə Vyetnama və Vyetnam lideri Ho Şi Minin 1959-cu ildə Bakıya tarixi səfərlərini, həmçinin Vyetnam Kommunist Partiyası Mərkəzi Komitəsinin Baş katibi To Lamın bu ilin may ayında Bakıya dövlət səfəri zamanı Azərbaycan Prezidenti İlham Əliyevlə görüşünü əks etdirən şəkillər və digər materiallar nümayiş etdirilib, iştirakçılara və qonaqlara Azərbaycan mətbəxinin ləziz nümunələri (qutab, dolma, plov, müxtəlif növ kabablar və Azərbaycan çayı) təqdim olunub.

Azərbaycan səfirliyinin dəvəti ilə beynəlxalq kulinariya sahəsində tanınmış aşpaz, Dünya Barbekü Assosiasiyasının (WBQA) vitse-prezidenti, Dünya Aşpazlar Assosiasiyasının (WACS) rəsmi hakimi, həmyerlimiz Sahib-David İsrafilov festivalda milli yeməklərimizin təqdimatını edib.

Festival zamanı yerli sakinlər və xarici turistlər tərəfindən ən çox ziyarət olunan pavilyonlardan biri Azərbaycana aid olub. Festivalda səfirliyin tərəfdaşı olan Hanoy Ticarət və Turizm Kollecinin tələbələri Azərbaycan pavilyonun fəaliyyətinə dəstək olublar.

Globalart.az