Matias Romero İnstitutunda Azərbaycanın sülhə və regional rifaha aparan yolundan danışılıb

Meksikaya işgüzar səfər çərçivəsində Milli Məclisin nümayəndə heyəti Matias Romero adına İnstitutda olub.

Globalart.az “AZƏRTAC”a istinadən xəbər verir ki, institutun Baş direktoru Xuan Xose Bremer de Martino ilə görüşdə akademik əməkdaşlıq imkanları, ADA Universiteti və digər təhsil müəssisələri ilə əməkdaşlıq perspektivləri, regional məsələlər və ikitərəfli münasibətlərin yeni istiqamətləri müzakirə edilib.

Görüşdən sonra nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidovun “Cənubi Qafqazda yeni reallıqlar: Azərbaycanın sülh və regional rifaha aparan yolu” mövzusunda mühazirəsi dinlənilib.

Mühazirədə Azərbaycanın müstəqillik yolu, Ümummilli Lider, müasir müstəqil dövlətimizin memarı Heydər Əliyevin ölkəmizin müstəqilliyinin bərpası, möhkəmləndirilməsi və inkişafı istiqamətində göstərdiyi əvəzsiz xidmətlərdən bəhs edilib. Eyni zamanda, Prezident İlham Əliyevin rəhbərliyi altında müasir Azərbaycanın inkişaf mərhələsi, 44 günlük Vətən müharibəsi, ölkəmizin sülh gündəliyi, bölgədə formalaşmış yeni geosiyasi reallıqlar və əməkdaşlıq perspektivləri barədə məlumat verilib və iştirakçıların sualları cavablandırılıb.

Globalart.az