Milli Gimnastika Arenasında Dünya Kuboku keçirilib

Fevralın 21-22-də Milli Gimnastika Arenasında batut gimnastikası və tamblinq üzrə Dünya Kuboku keçirilib. Yarışda 6 ölkədən ümumilikdə 66 gimnast iştirak edib. Batut gimnastikası üzrə idmançılar fərdi (qadınlar və kişilər), sinxron (qadınlar və kişilər) və qarışıq sinxron proqramlarda qüvvələrini sınayıblar. Yarışın ilk günündə təsnifat mərhələsi, ikinci günündə isə final çıxışları baş tutub.

Globalart.az Azərbaycan Respublikasının Gənclər və İdman Nazirliyinə istinadən xəbər verir ki, Azərbaycan gimnastları Bakıda təşkil olunan Dünya Kubokunu altı medalla tamamlayıblar. Selcan Mahsudova – Maqsud Mahsudov tandemi qarışıq sinxron proqramda qızıl medala layiq görülüb. Cütlük yekun sıralamada birinci yeri tutub. Tamblinq üzrə mübarizədə Mixail Malkin qızıl, Tofiq Əliyev isə gümüş medal qazanıblar.

Batut gimnastikasında isə Maqsud Mahsudov – Hüseyn Abbasov və Selcan Mahsudova – Şəfiqə Hümbətova duetləri sinxron proqramda bürünc medal əldə ediblər. Selcan Mahsudova fərdi proqramda da gümüş medal qazanaraq komandamızın aktivinə daha bir uğur əlavə edib.

Təsnifat mərhələsində ən yüksək icra xalı toplayan idmançılara AGF Trophy kuboku təqdim edilib. Tamblinq üzrə gimnastımız Mixail Malkin kişilər arasında AGF Trophy kubokunun qalibi olub.

Globalart.az