Milli Qəhrəmanın xatirəsinə həsr olunmuş turnir keçirilib

Mingəçevir Dövlət Universiteti (MDU) və Mərkəzi Aran Regional Gənclər və İdman İdarəsinin birgə təşkilatçılığı ilə Azərbaycanın Milli Qəhrəmanı Natiq Qasımovun xatirəsinə həsr olunmuş region universitetləri arasında voleybol turniri keçirilib.

Globalart.az xəbər verir ki, tədbirdə iştirak edən Milli Qəhrəman Natiq Qasımovun qardaşı Nofəl Qasımov ailə üzvləri adından göstərilən diqqət və ehtirama görə minnətdarlığını bildirib. O, Natiq Qasımovun göstərdiyi şücaətin və onun keçdiyi şərəfli döyüş yolunun bu gün gənclər tərəfindən uca tutulmasının qürurverici olduğunu vurğulayıb. Nofəl Qasımov idmançılara müraciət edərək, onlara hər zaman Natiq kimi mətin və yenilməz olmağı tövsiyə edib.

Birincilik uğrunda mübarizədə Mingəçevir Dövlət Universiteti, UNEC-in Zaqatala filialı, Gəncə Dövlət Universiteti və Azərbaycan Texnologiya Universitetinin voleybol komandaları qarşılaşıblar. Turnirin yekun nəticəsinə əsasən, Gəncə Dövlət Universitetinin komandası I yerə, Mingəçevir Dövlət Universitetinin komandası II yerə, UNEC-in Zaqatala filialının komandası III yerə, Azərbaycan Texnologiya Universitetinin komandası isə IV yerə sahibi olub. Qalib komandalara və fərqlənən idmançılara müvafiq dərəcəli medal və diplomlar təqdim edilib.

Globalart.az