Prezident Kitabxanasında 27 Sentyabr – Anım Gününə həsr olunmuş tədbir keçirilib

Prezident Kitabxanasının konfrans zalında 27 Sentyabr – Anım Gününə həsr olunmuş tədbir keçirilib.

Globalart.az “AZƏRTAC”a istinadən xəbər verir ki, əvvəlcə şəhidlərin xatirəsi bir dəqiqəlik sükutla yad edilib, Dövlət Himni səsləndirilib.

Tədbirdə çıxış edən Prezident Kitabxanasının direktoru professor Afət Abbasova 27 Sentyabr – Anım Gününün Azərbaycan xalqının milli yaddaşında dərin iz buraxan və əbədi yaşadılacaq bir tarix olduğunu vurğulayıb.

O qeyd edib ki, Anım Günü 2020-ci il sentyabrın 27-dən noyabrın 10-dək davam edən və şanlı Qələbə ilə nəticələnən 44 günlük Vətən müharibəsində şəhid olmuş qəhrəmanların əziz xatirəsini yad etmək məqsədilə Prezident İlham Əliyevin 2 dekabr 2020-ci il tarixli Sərəncamı ilə təsis edilib.

Afət Abbasova çıxışında, həmçinin diqqətə çatdırıb ki, bu Zəfər Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin qətiyyətli siyasi iradəsi, müdrik sərkərdəlik bacarığı və uzaqgörənliyi nəticəsində mümkün olub. Onun rəhbərliyi ilə rəşadətli Azərbaycan Ordusu torpaqlarımızı işğaldan azad edərək ölkəmizin ərazi bütövlüyünü bərpa etmiş, xalqımızın qəhrəmanlıq salnaməsini yazmışdır.

Tədbirdə çıxış edən bölmə müdirləri Kəmalə Qasımova, Zakir İsmayılov, Prezident Kitabxanasının direktorunun müşaviri Nazim Mustafa, kitabxana fondu bölməsinin məsləhətçi-biblioqrafı Rəxşan Quliyeva 44 günlük Vətən müharibəsinin milli tariximizdəki mühüm rolundan bəhs edərək şəhidlərin ruhuna ehtiramlarını bildiriblər.

Tədbirin sonunda Anım Gününə həsr olunmuş videoçarx nümayiş etdirilib.

Globalart.az