“Qarabağ”ın prezidenti: Möhtəşəm oynadıq, çox qürurluyam

İki gün sonra Zəfər Gününü qeyd edəcəyik. “Qarabağ” bu gün bütün dünyaya sübut edir ki, Azərbaycan xalqı cəsarətlidir.

Globalart.az “AZƏRTAC”a istinadən xəbər verir ki, bu sözləri “Qarabağ”ın prezidenti Tahir Gözəl UEFA Çempionlar Liqasının əsas mərhələsinin IV turunun “Çelsi” ilə oyunundan sonra deyib.

Türkiyəli funksioner 2:2 hesablı heç-heçə ilə bitən matçla bağlı fikirlərini bölüşüb: “Necə rahat oynadığımızı gördünüz? İkinci topu hücumda olarkən buraxdıq. Çox gözəl, sürətli oyun idi. Komandamızla fəxr edirəm. Bəlkə də Azərbaycan futbolunun tarixində ən baxımlı matçlardan biri idi. Qalib gəlmək şansımız var idi. Təsadüf nəticəsində qol buraxdıq. Bununla belə, ümidliyik. Bir qələbə də qazansaq, pley-off şansımız daha da artar. Hələ vəsiqəni təmin etməmişik. Ona görə də nəsə demək tezdir. İnanıram ki, bacaracağıq”.

O, İngiltərə nəhəngi ilə heç-heçəyə görə, Azərbaycan xalqını və ölkə rəhbərliyini təbrik edib: “Möhtəşəm oynadıq, çox qürurluyam. Hesab 2:1 olarkən 3-cü qolumuzu gözləyirdim. Çünki artıq özümüzə inam gəlmişdi. Çoxlu qol epizodumuz oldu. Nəzərə alaq ki, rəqib “Çelsi” idi. Heyətində çox təhlükəli oyunçular var. Macəra davam edir. Böyük həyəcanla ilk “24-lüy”ə düşəcəyimizi gözləyirəm”.

Qeyd edək ki, “Qarabağ” Liqa mərhələsində 5-ci oyununu noyabrın 26-da İtaliyada “Napoli”yə qarşı keçirəcək.

Globalart.az