Qazaxıstanda “Silk Way Star” yarışmasının ilk mərhələsi başa çatıb.

Globalart.az APA-ya istinadən xəbər verir ki, birinci mərhələdə 12 iştirakçının hər biri mahnını öz ana dilində ifa edib.

Məlumata görə, start mərhələsinin özəlliyi ondan ibarətdir ki, heç bir iştirakçı layihəni tərk etməyib. Yəni bütün ifaçılar hələ də yarışda qalaraq qələbə uğrunda mübarizəni davam etdirirlər.

Münsiflərin qərarına əsasən, birinci yeri 126 xalla malayziyalı müğənni Yazmin Əziz tutub. İkinci yeri 122 xalla özbək ifaçı Madinabonu Adilova, üçüncü və dördüncü yerləri isə müvafiq olaraq 120 xalla türkmənistanlı Dovran Şammiyev və gürcü iştirakçı Avtandil Abeslamidze bölüşüblər.

“Silk Way Star” beynəlxalq müsabiqəsi 10 epizoddan ibarətdir və hər buraxılışın müddəti 100 dəqiqədən artıqdır. Yarışma qazax, çin və ingilis dillərində yayımlanır. Təşkilatçılar tamaşaçılara müxtəlif janrlarda eksklüziv musiqi nömrələri təqdim edəcəklərini bildiriblər.

Müsabiqəyə sentyabrın 20-də Qazaxıstanda start verilib, növbəti mərhələ isə Çində keçiriləcək. Final “Grand Şou” noyabrın 22-də baş tutacaq.

Yarışma zamanı diqqətçəkən anlar da yaşanıb. Belə ki, Azərbaycan və Ermənistanı təmsil edən münsiflər qarşılıqlı jest ediblər: azərbaycanlı jüri erməni ifaçı Saro Gevorgyana ən yüksək bal – 10 xal verib, erməni jüri isə cavab olaraq Azərbaycan təmsilçisi Səbinə Quluzadəni 10 xala layiq görüb.

Globalart.az