Rəssam Tahir Məmmədovun fərdi rəsm sərgisinin açılışı oldu

Uzun illərə dayanan yaradıcılıq təcrübəsi sənətkarın hər bir əsərini yalnız həyat yolunun bir izi kimi deyil, eyni zamanda müstəqil estetik kainata çevirir. QGallery Azərbaycan Respublikasının Əməkdar rəssamı, professor Tahir Məmmədovun yaradıcılığına həsr olunmuş “Yer, Külək və Alov” adlı sərgini sizlərə təqdim edir. Bu sərgi rəngkarlıq və formanın sərhədsiz imkanlarını, gücünü və müəllifin cəsarətli, azad bədii düşüncəsini ön plana çıxarır.

Tahir Məmmədov son əlli il ərzində Azərbaycan rəngkarlığının simasını formalaşdıran sənətkarlardan biridir. Onun əsərləri rəngin enerjisini, fırça zərbələrinin ritmini, xətt və fakturaların yaratdığı dramatik gərginliyi bir araya gətirərək güclü emosional təsir formalaşdırır.

İllər ərzində Tahir Məmmədovun yaradıcılığı geniş ictimai tanınma qazanmışdır. O “Soltan Məhəmməd” və “Humay” mükafatlarına, SSRİ Rəssamlıq Akademiyasının diplomuna, Azərbaycan Respublikasının Əməkdar rəssamı fəxri adına layiq görülmüşdür. Sənətkar Əmək ordeni ilə təltif olunmuş, Azərbaycan Respublikası Mədəniyyət Nazirliyinin Fəxri diplomunu almış, eyni zamanda Rəssamlar İttifaqının Gənclər Birliyinə rəhbərlik etmişdir. Bununla yanaşı, onun irsinin əsas dəyəri titul və mükafatlarla deyil, izləyicinin daxili dünyasında incə duyğular və emosiyalar oyadan zəngin bədii irsdə təcəssüm olunur.

Tahir Məmmədovun əsərləri dünyanın aparıcı muzey və qalereyalarında, o cümlədən, Tretyakov Qalereyasında, Şərq İncəsənəti Muzeyində, Paris və Belçikadakı sərgi məkanlarında, həmçinin, ABŞ, Yaponiya, Almaniya və Türkiyədə şəxsi kolleksiyalarda saxlanılır. Onun ABŞ, Paris, Belçika və Moskvada keçirilən fərdi sərgiləri müntəzam olaraq mühüm mədəni hadisələrə çevrilmiş, hər bir əsəri öz güclü ifadə potensialı ilə tənqidçilərin diqqətini xüsusilə cəlb etmişdir.

Onun pedaqoji fəaliyyəti və fotoqrafiyaya verdiyi töhfələr də az əhəmiyyət kəsb etmir. Lakin bu sərgidə diqqət rəngkarlığa yönəlir. Sənətkarın yaradıcılıq enerjisi və dramatik ifadəsi tam şəkildə öz əksini məhz kətan üzərində tapır. Əsərləri göstərir ki, rəngkarlıq sadəcə vizual təsvir deyil, eləcə də, izləyicidə rəng, hərəkət və faktura anlayışının dəyişə bilən emosional rezonans yaratdığı bir ruh halıdır.

Sənətkar heç vaxt yeni üfuqlərə açılmaqdan çəkinmir. O cəsarətlə məlum olan formalardan imtina edir və həm özü, həm də izləyici üçün rəng və kompozisiya sahəsində yeni, daha kəşf edilməmiş olanı axtarır.

Bu sərgi izləyiciyə nəfəs alan, hərəkətdə olan və danışan rəngkarlıqla tanış olmaq üçün nadir imkan təqdim edir. Tahir Məmmədovun kətanlarında öz yerini tapan hər bir fırça zərbəsi, faktura, rang izləyicini keçmiş, indi və gələcəyin fərah bədii hissin sərhədində birləşdiyi vizual ifadə dünyasına dəvət edir.

“Yer, Külək və Alov” sərgisi 7 fevral (daxil olmaqla) tarixinədək İctimaiyyətə açıqdır. Bu ecazkar sərginin bir parçası olmaq və rəngkarlığın yaratdığı duyğulara qərq olmaq üçün tələsin.

Globalart.az