Vyanada “Türk həftəsi” çərçivəsində qala-konsert keçirilib

Vyana şəhərində təşkil olunan “Türk həftəsi” çərçivəsində qala-konsert keçirilib.

Globalart.az “AZƏRTAC”a istinadən xəbər verir ki, Türk Dövlətləri Təşkilatı (TDT) və təşkilata üzv dövlətlərin Vyanada akkreditə olmuş səfirliklərinin birgə təşkilatçılığı ilə keçirilən konsertdən öncə TDT-nin baş katibi Kubanıçbek Ömüralıyev və Qırğızıstanın mədəniyyət naziri Mirbek Mambataliyev təşkilatçılar adından çıxış ediblər. Bildirilib ki, Avropanın mədəni, tarixi və elmi mərkəzlərindən biri olan Vyanada keçirilən “Türk həftəsi” Türk dünyasının strateji mövqeyinin, mədəni irsinin və əməkdaşlıq potensialının çoxtərəfli mühitdə təqdim olunmasında mühüm rol oynayır və bu təşəbbüs beynəlxalq diplomatiyanın və əməkdaşlığın daha da güclənməsinə xidmət edəcəkdir.

Konsertdə Azərbaycan, Qazaxıstan, Qırğızıstan, Türkiyə və Özbəkistan musiqiçiləri rəngarəng musiqi proqramı ilə çıxış ediblər. Azərbaycandan Xalq artisti Ənvər Sadıqovun rəhbərlik etdiyi “Qaytağı” ansamblı, Qazaxıstandan “Temirlan və Yernat” dueti, Qırğızıstandan “Kambarkan” folklor və etnoqrafik ansamblı, Türkiyədən “Yeden” ansamblı və Özbəkistandan “Xalqlar dostluğu” ansamblının təqdim etdiyi xalq və bəstəkar mahnıları, eləcə də qazax və özbək rəqqasların ifaları böyük maraqla qarşılanıb.

Vyananın ən müasir konsert salonları sırasında yer alan “MuTh” konsert salonunda baş tutan tədbirdə Vyanada akkreditə olunmuş diplomatik korpus və beynəlxalq təşkilatların təmsilçiləri, yerli ictimaiyyət və media nümayəndələri, türkdilli ölkələrin Avstriyadakı icmalarının üzvləri və musiqisevərlər iştirak ediblər.

Azərbaycanın TDT-yə sədrliyi ilində təşkil edilən qala-konsert Türk dövlətləri arasında mədəni əlaqələrin dərinliyini göstərməklə, Avropa tamaşaçılarında da bu mədəni zənginliyi daha yaxından tanımaq imkanı yaradıb.

Globalart.az