Zara: Qlobal moda imperiyası

9 may 1975-ci il İspaniyanın A Coruña şəhərində, balaca bir mağazanın qapıları ilk dəfə açıldı. Bu mağaza “Zara” adını daşıyırdı. Onun yaradıcısı Amancio Ortega idi. O, sadə bir dərzi, amma böyük bir vizion sahibi idi.

Globalart.az bildirir ki, Ortega o dövrdə artıq geyim dünyasında təcrübəli idi. 1963-cü ildən etibarən “Confecciones GOA” şirkəti ilə on ildən çox geyim istehsalı ilə məşğul idi. Lakin Zaranın qapıları açılan gün, bu hekayə yeni bir mərhələyə qədəm qoydu. Çünki o andan etibarən sadəcə geyim deyil, “insanı modanın mərkəzinə qoymaq” fikri satılmağa başladı.

Zara ilk gündən qadın, kişi və uşaq kolleksiyaları ilə çıxış edərək müştərilərinin səsini dinləməyi, onların istəklərinə qulaq asmağı əsas prinsipi seçdi. Məqsəd sadə idi. Keyfiyyətli və zövqlü modanı hər kəs üçün əlçatan etmək.

Bu gün Zaranın uğurunun sirri də elə buradadır. Şirkət bütün dünyadakı satışları və trendləri real vaxtda təhlil edir, bu məlumatları isə 300-dən çox dizayner və yaradıcılıq komandası ilə birgə yeni kolleksiyalara çevirir. Hər geyim parçasının arxasında zövq, dinamizm və çeviklik dayanır.

Zaranın yaradıcılıq prosesi təkcə şirkət daxilində deyil, məşhur dizaynerlər və sənətkarlarla əməkdaşlıqla da zənginləşir. Nəticədə hər kolleksiya müasirliyin, sadəliyin və incə zövqün vəhdətinə çevrilir.

2025-ci ilə gəldikdə isə Zara artıq 98 ölkədə fiziki, 214 bazarda isə onlayn fəaliyyət göstərir. Bu, sadəcə bir brendin deyil, bir dünya dilinin uğurudur. Zara dünyanın harasında olursa-olsun, müştəriləri ilə birbaşa dialoq qurmağı bacarır. Fiziki mağazalar və inteqrə olunmuş onlayn platformalar bir-birini tamamlayaraq müştərilərə problemsiz, rahat və zövqlü alış-veriş təcrübəsi təqdim edir.

Zara mağazaları təkcə geyim məkanı deyil, həm də incə memarlığın, dizaynın və texnologiyanın vəhdətidir. Hər mağaza, tarixi ruhu və müasir zərifliyi özündə birləşdirən bir layihə kimi yaradılır.

Markanın yarım əsrlik irsi çevik istehsal, güclü logistika, möhtəşəm yerlərdə yerləşən mağazalar şəbəkəsi, onlayn satış platforması və daima yenilənən alış-veriş təcrübəsi üzərində qurulub.

Bugün Zara sadəcə bir moda brendi deyil, insanları birləşdirən estetik dil, hər kəsin öz tərzini tapdığı bir məkandır.

Globalart.az